మొదటి పీరియడ్స్ గురించి కూతురుకి తల్లి ఖచ్చితంగా చెప్పాల్సిన విషయాలు ఇవే.

పీరియడ్స్.. టీనేజ్ లోకి వచ్చిన అమ్మాయిల విషయంలో ఇది మరింతగా ఉంటుంది. ఆ సమయంలో వారి మూడ్ స్వింగ్స్.. తెలియని కొత్త అనుభవం.. తమలో కలుగుతున్న మార్పులు ఎందుకో, ఏంజరుగుతుందో తెలియక ఇబ్బంది. ఇవ్వన్నీ వారిని అప్పటివరకున్న దానికంటే భిన్నంగా మార్చేస్తుంటాయి. అయితే పీరియడ్స్ అనేది సహజమైన ప్రక్రియ. ఈ సమయంలో శరీరంలో హార్మోన్లలో మార్పులు వస్తాయి. శరీరంలో జరిగే ప్రక్రియల వల్ల ఒత్తిడి వస్తుంది. ఇక మొదటి పీరియడ్స్ విషయానికి వస్తే.. దాని గురించి కూతుళ్ల మనసులో కొంత అలజడి. ప్రతి తల్లి తన కుమార్తెకు సరైన సమాచారం ఇవ్వాలి. దాని గురించి ముందుగానే చెప్పాలి.
పీరియడ్స్ గురించి అనేక రకాల అపోహలు ప్రబలంగా ఉన్నాయి.

వాటిలో చాలా వరకూ లాజిక్ లేనివే ఉంటాయి. అయితే అపోహలు ఉన్నా.. వాటి మీద పెద్దగా.. చర్చ జరగకపోవడం వల్ల, ఆడపిల్లలు అనేక సమస్యలను ఎదుర్కోవలసి వస్తుంది. కుమార్తెలను తల్లులు దీని గురించి ముందుగానే సిద్ధం చేయాలి. వారి విశ్వాస స్థాయి కూడా ఎక్కువగా ఉంటుంది. కాబట్టి మీ కుమార్తెకు మొదటి పీరియడ్స్ గురించి వివరించాలి. వారిని ఒత్తిడికి గురిచేయొద్దు. ఈరోజుల్లో టీవీల్లో శానిటరీ న్యాప్‌కిన్‌ల ప్రకటనలు ఎక్కువగా వస్తున్నాయి. కొన్నిసార్లు కుమార్తెలు కూడా దాని గురించి అడుగుతారు. మీ కుమార్తెకు ఎప్పుడైనా పీరియడ్స్ వచ్చే దశలో ఉంటే, ఎలాంటి సంకోచం లేకుండా ఆమెకు పీరియడ్స్ గురించి చెప్పడం ప్రారంభించండి.

ప్రకటనను చూపడం ద్వారా నెలలోని కొన్ని రోజులలో రక్తస్రావం జరుగుతుందని, ఇది సాధారణ ప్రక్రియ అని, భయపడాల్సిన అవసరం లేదని మీ కుమార్తెకు చెప్పండి. మీ కుమార్తె దీనికి సంబంధించిన ఏదైనా ప్రశ్న అడిగితే, దానిని సరిగ్గా వివరించండి. అదేవిధంగా పేపర్‌లో ప్రకటనలు కూడా కనిపిస్తాయి. వాటిని చూపడం ద్వారా మీరు కుమార్తెకు పీరియడ్స్ గురించి చెప్పవచ్చు. మొదటిసారి పీరియడ్స్ గురించి మాట్లాడేటప్పుడు మామూలుగా మాట్లాడండి. అది పెద్ద విషయంలా వారికి చెప్పొద్దు. ప్రతి 28 రోజులకోసారి వచ్చే రుతు చక్రం గురించి విడమరిచి చెప్పండి. అసలు ఎందుకొస్తుంది? వంటి లోతైన ప్రశ్నలు అడిగినప్పుడు సంతానోత్పత్తి ప్రక్రియ, అండాశయం నుంచి అండం విడుదల,

రుతుస్రావం ప్రక్రియ వంటి సమాచారం కూడా మీరు లోతుగా తెలుసుకుని చెప్పొచ్చు. తన క్లాస్‌మేట్స్ లేదా స్నేహితుల ద్వారా కూతురికి పీరియడ్స్ గురించి కొంచెం తెలిసే అవకాశం ఉంది. ఇలాంటి పరిస్థితుల్లో కూతురి వద్ద విషయాలు దాచిపెట్టకుండా ఆమెతో స్నేహంగా ఉంటూ మాట్లాడండి. దీంతో కూతురు పీరియడ్స్ విషయంలో తన డైలమా లేదా ఎలాంటి సమస్యనైనా సహజంగా చెప్పుకోగలుగుతుంది. మీరు సరైన సమయంలో ఆమెకు చిన్నపాటి సమాచారం ఇస్తూ ఉంటే, ఎలాంటి గందరగోళం, ఒత్తిడిని నివారించవచ్చు. అలాగే, ఆమెకు మొదటి పీరియడ్స్ వచ్చినట్లయితే భయపడకుండా ఉంటుంది. సాధారణంగా ఇళ్లలో పీరియడ్స్ గురించి ఓపెన్ టాక్ ఉండదు.

మీరే ఈ రకంగా ఉంటే.. మీ కుమార్తెలు పీరియడ్స్ గురించి సరైన సమాచారాన్ని పొందలేరు. పీరియడ్స్‌కు సంబంధించిన మొత్తం సమాచారాన్ని నెమ్మదిగా చెప్పడం ప్రారంభించండి. కూతురికి ఏదైనా తప్పుడు విషయం చెబితే, ఆమె శరీరంలో జరిగే మార్పులు మరియు దానికి సంబంధించిన విషయాల గురించి గందరగోళానికి గురవుతుంది. ఇది ప్రతి స్త్రీకి జరిగే సహజ ప్రక్రియ అని మీరు కుమార్తెకు నెమ్మదిగా చెప్పాలి. కూతురికి వాస్తవాన్ని చెప్పడం ద్వారా ఆమె పీరియడ్స్ సమయంలో పరిశుభ్రతను పాటిస్తుంది. ఇది ఆమె ఋతు ఆరోగ్యంపై ప్రభావం చూపదు. న్యాప్‌కిన్‌ల వాడకం, పారవేయడం, శుభ్రతకు సంబంధించిన విషయాల గురించి చెప్పడం చాలా ముఖ్యం.